కోపం కింద నీడ

నేను సగం నిద్రలో ఉన్నట్టున్నాను 
ఏదో అడుగుతున్నావు 
కోపానికి కొంచెం రంగులద్ది 
భూచక్రం లా చేసి వదులుతావు 

నీ ప్రశ్నలు బాణాలే
వదిలిన వెంటనే అవి 
రూపం మార్చుకొని కొరడాలౌతాయి 
ఏం చేయను 
సమాధానాలు వినే శక్తిని 
నీ ప్రశ్నలు కోల్పోతాయి 
అంటే... అవి అంగ వైల్యపు ప్రశ్నలు 

సరే ...ఎటూ ఒక దేశంలో 
తన్నులాడుకునే రెండు జాతుల్లా 
పోరాటంలో మన జీవితం 
మంచు ముత్యం కాక తప్పదు 
వయసుకు ముడత లొచ్చాక 
పల్లూడిపోతాయి ...
తప్పదు తప్పదు 

అప్పుడు నీ ప్రశ్నలు 
దూది వత్తుల్లా చేసి 
దీపం పెట్టు....
ఆ వెలుతుర్లో నిను చూసుకుంటూ
గడచిన కాలం లోని 
తేదీలను జోకులుగా వదులుతా 

నువ్వూ ముసలి నవ్వు 
నవ్వుదువు గాని 

.....