మన ముచ్చట్లకి పేరెందుకు ?

పరాయి ప్రపంచం లో 
బతుకుతున్న నేను 
నా జాడలు తప్పిపోయిన చోటు 
వెతుకుతున్నాను 
అందులో నిన్నూ _


నువు కలిసిన ఆకాశం 
ఇప్పటికీ ఉంది 
కానీ మన ముచ్చట్లు విన్న 
మబ్బులు దూరమయ్యాయి 


నీ గోరింట చేతులు వెన్నెల నింపి 
వేళ్ళ సందుల్లోంచి 
నా ముఖం మీదికి ఒంపితే 
తడుముకున్న నా చేతికి 
తడి తగిలింది 


రోజూ కొన్ని పొరల్ని 
పోగొట్టుకుంటూ 
మౌనాన్ని నీ కంపనాలతో 
రాజేసుకుంటూ 
పొద్దుట సూర్యున్ని బతిమిలాడి 
పక్కకు తోసి 
బాధల్ని ఉదయింప  చేసుకుంటూ 


నిన్ను చేరే ప్రయాణానికి 
ముగింపు ఉందొ లేదో 
కాలానికి గడియారపు ముల్లునై
పంచాలోకాల మీదుగా వెళ్తూ వెళ్తూ 
కొన్ని అక్షరాలని జార్చుకుంటాను 


నీకు వీలున్నప్పుడు చదువు 


అదే నా ప్రేమ జాడ 


     .....