వారాంతపు పని

ఎగురుతూ దుముకుతూ
ఉద్దేశ్యం లేని పరుగుతో
ఒగిరిస్తూ

దాచుకున్న ఆటని
బయటకు లాగుతూ

కిందపడి దెబ్బని తాకి
ఒక రక్తపు చుక్కని కూడా
అబ్బబ్బ అన్న తీరుతో
అబ్బుర పరుస్తూ

ఏడుపుకు ఏడుపుకు మధ్య
దొంగేడుపుతో అలరిస్తూ

పిల్లలు
ఆదివారాన్ని ఆనందిస్తారు

పెద్దలు
రోజూ ఏదో ఒక ఏడుపు
ఏడుపు లాంటి ఏడుపు
ఏడుపు కాకుండ ఏడుపు తో
ఆరు రోజులు కారించి

ఆదివారం రోజు
ఆరురోజుల ఏడుపును గుర్తుచేసుకుంటూ
వచ్చిన వారికి వడ్డించుకుంటూ...

.....
6-1-2014