ఎటు?

ఏ ప్రశ్నలూ లేక
ఏ సంశయాలూ లేక
ఇప్పుడు మాట్లాడుకోవాలి

జాగ్రత్త కోసం ఓ సూచన
భూగోళం కాళ్ల కింద తిరుగుతుంది
వెలుతురు అస్తమించక ముందే
భయంతో పాటు శవాన్ని కాల్చేయాలి

గొడవ పడే అనేక విషయాలకు
దృష్టి మొలిచింది
వాటికీ నిరుత్సాహపు ఎదురుచూపు

అనివార్యమైనదొకటే
తడబడుతూనైనా తట్టుకోవటం

కడుపారా మాట్లాడుకుందాం
ద్రవీభవించిన బాధల్ని వార్చుకోనీ
అర్ధాంతర సాయంత్రం ఆవహిస్తుందేమో

రహస్య కన్నీటి జాడలు
కొన్నివాక్యాలను ఇంకా ఉఛ్ఛరిస్తూనేవున్నాయి

విషయాలను హత్తుకొని
మనుషుల్ని వదిలేసుకున్న అజ్ఞానంతో
వెనక్కి చూసినపుడు
నేను బయలుదేరిన చోటే ఇంకా ఆగి వున్నావు

సరే!
ఇక సమస్త గర్వాలకి,భయాలకు
సమస్త ఈసడింపులకి
సమాధానం దొరకని ఆవేశాలకి
సగం కాలిన అహంకారాలకి
వినమ్రంగా తలవంచుకొని.

.....