ఈ వేళలో .....2

కొన్ని బిగపట్టుకుంటున్న
శ్వాస ల్లో నువ్వుంటున్నావు 

గాలి మోసుకొచ్చేప్రతి సమయము 
నీ స్పర్శ లోనే పులకిస్తుంది 

మానసిక రహదారులన్నీ 
శుభ్రంగా నీ వైపుకే జారి ఉన్నాయి 

ఎప్పుడో గాని అసత్యం పిండదశ 
తొలగించుకోక తప్పదు 

అకాలం అసలుండదు 
ఎన్ని చెప్పినా చీకటికి 
కొంత సమయముంటుంది ...
అదే దాని ఆయువు .

వెనుదిరిగి చూసుకోక తప్పనప్పుడు 
వాదనల చెదలు చేసేపని 
తెలియనిది కాదు.

ఏమోలే!
అన్నీ సూత్రాలలో చిక్కవు 
అసలు చిక్కులన్నీ సూత్రాలనుంచే ...

తప్పులు కూడా దృష్టి మార్చు కుంటాయి 
మూడో కన్నె ప్పుడూ 
మెడ పొడవు చేసుకొని 
మెదులుతుంటుంది ,
మనం జాగ్రత్తగా దాన్ని ముయ్యాలి 
లేదా 
మన కంటి చుక్కల నైనా 
నిరపాయంగా ప్రేమించాలి 

ఆకలి మీద ఆన 
సత్యానికి అనేక వ్యాఖ్యానాలుండవు .

       .....
4.12.2012.