కలవరింత కలవరింత కలవరింత // డా.పులిపాటి గురుస్వామి //

ఎక్కడా దిక్కు తోచని సమయం లో
నువ్వు గుర్తుకు వస్తావు.


పరిమిత మైన జ్ఞానం నిన్ను పూర్తిగా చేరనివ్వదు.

ఒక తడి గుడ్డ చుట్టిన తపన
నోరు తెరుచు కుంటుంది

చెప్పుకోవడానికి ఎవరున్నారు దుఃఖం తప్ప

అదీ ఒక్కోసారి మాట వినక
ప్రతి కంటి చివర వేలాడుతూ ...నా లోపలికే చేరుతుంది

కలలు కూడా కనికరించని కాడ వల నిండా నేనే వుంటిని

సమయానికి కూడా
చిక్కనంత చిక్కుకుపోయాం అవునా?

ఏ చిరుగు కాడ కప్పి కుట్టు కుందామన్నా సరిపోయేలా లేవు నువ్వు

అప్పటికప్పుడు కొన్ని మాగిన వాక్యాల
ఉద్రేకం మీద నీ చూపు వాలితే ఇంకేముంది ...

అంతా శూన్యం అనిపించటం ఎంతసేపు.

.....
11-4-2014