వానధ్యానం

శబ్ధాలన్నీతమ తమ
బోరియల్లోకి వెళ్ళాక ,రాత్రి
రంగస్థలం మీదికి నటుడు
ప్రవేశించేముందు తెరలేచినట్టు
మెల్ల మెల్లగా...

చినుకులు చినుకులు
వాయిద్యకారులనేకమంది
ఒకే మంద్ర స్వరంతో
ఆకాశం నుండి వినిపిస్తున్న స్వర ధార

చీకటి నిశ్శబ్ధం తడిసిపోతూ
రెండు చేతులడ్డం పెట్టి
కేవలం చినుకుల లయని
మనసు చుట్టూ అల్లుకుపోతున్న సమయాన

దుప్పటికింది అవయవాలన్నీ
ముడుచుకొని ,
వెచ్చదనాన్ని కాపుకుంటూ
చెవులని కలువల్లా తెరిచి
వాన చినుకుల్ని స్పర్శిస్తూ
పక్షుల్లా నిశ్చేష్ట మై

చినుకులు చినుకులు
ఒకదానికొకటి రాసుకుంటున్న చప్పుడు
నీటి మీద నీరు పడుతున్న గలగల

ఏకాంత లయలో మనసు తడుస్తూ

మైదానంలో ఒకే ఒక తాటి చెట్టు నిలబడి
తడుస్తున్నట్టు
ఒళ్లంతా నీరు ప్రవహిస్తున్న ధ్వని

కొంత సమయానికి
చినుకుల శబ్ధమే నేనై మిగిలి.

.....