తెలియనితనం వెంట

వెలిగించ లేని సమయాలు 
దగ్గరనుండే వెళ్ళిపోతాయి 
ఒక దాపు దొరకక 
గీసే చిత్రం దారి తప్పుతుంది 


అనాధ ఎవరో తెలియని 
మనసు 


పనీ పాటల సాయంత్రాలు 
చెమట గాలుల మీదుగా కరిగిపోతాయి 
ఈరోజోక ప్రశ్న 
రేపటికి సమాధానం తయారు కాలేదు 


నడక తెలియని వారే 
అందరూ నడుస్తూ వుంటారు 


చేతులు కలుస్తూ వుంటాయి 
కాళ్ళు విడి పోతుంటాయి 
జీవితం పెనవేసుకునే 
మర్మం 
అంతుపట్టక ముందే 
క్యూ పెరుగుతూనే వుంటుంది 


ఏదీ తెలుసుకోకుండానే 
కథ నిద్ర పోతుంది .

       .....