క(కా)వికలం

అగరొత్తుల పొగ పెట్టాలి 
ధూపం ,దీపం నైవేద్యం 
మంచి నెయ్యి సమర్పించాలి 
హాహాకారాలతో అభిమానంతో 
స్తోత్రాలు జై కొట్టాలి 
లేదంటే కనికరింపుకు 
కంటి చూపు తక్కువ.


పంచ రసాలు లేకుండా 
పకడ్బందీ పాయసం 
ఉడికీ ఉడకని రుచితో 
ఆకాశం తో సహా అన్ని దిక్కులకీ 
పంచగల సమర్ధత తో 
నీటి పుణ్య గతులకు 
లాగే శక్తికేం తక్కువ ?


శతాంశాల,సహస్రాంశాల పొగరు కూడా 
ఒక్కోసారి పొలికేకలు పెట్టి 
కీర్తి మీద రంకె ముద్రలు అద్దుకుంటూ 
కొత్త ముఖ చిత్రాన్ని 
త్రీడీ టెక్నాలజీ తో 
ఖండానికో తెలివిని 
ఆశ్చర్యం లో ఓలలాడిస్తూనే ఉంటది .


ఎటొచ్చీ జ్ఞానమో,మేధావితనమో  
ఒంటి రెక్క పూవులా వెలవెల పోకుండా 
రంగు రంగుల దేశ దేశాల దుస్తులతో 
ఆహార్యంతో ,ద్రువాల చలి గడ్డల్ని 
విసర్జించక పొతే 
కాన్వాస్ మీద వెలవెల పోక తప్పదని 
లోలోపల కుత కుతకి 
ఎవడ్నో ఒకడ్ని 
మంటల్లో వేయించక తప్పదు.


శుభం తధాస్తు .


తలలు శుభ్రం చేసుకోక  తప్పదు  
అక్షింతలు పట్టుకొని 
సిద్ధమైన లోపలి మేధావుల కోసం.

      .....