కొత్తగా పూస్తున్న గాలి

నేను నీకు
ఏదో చెప్పాలనుకున్నాను 


నా విచ్చుకుంటున్న భావాన్ని 
అందమైన పూలగుత్తిలా 
అలంకరించి ఇద్దామమనుకున్నాను 


కొత్తగా ఉండాలని 
అసలు వినగానే....
గుండె వెన్నెల ముద్దగునట్లు  
తయారుచేయదలిచాను 


మాటలు మల్లెల వంటివి 
మూట గట్టుకున్నాను 
రాత్రంతా చందనంలో తడిపి 
అత్తరు చల్లిపెట్టాను 


నిజం నీకు
ఏదో చెప్పదలిచాను ...


సంపెంగతో కాసేపు 
చింత చిగుళ్ళతో కాసేపు 
నీ గురించి మాట్లాడి 
నీ మనసురుచి సేకరించి 
వెన్నెల రాల్చిన ఆకాశపు చిత్రాల్ని 
కొత్తవి కొత్తవి కూడబెట్టుకున్నాను 


ధ్యాస ధ్యానమై 
ప్రతి నిమిషంలో 
నిను బంధించుకుంటూ 
శ్వాసను పవిత్రం చేసుకుంటూ 
ఆత్మను అలంకరించుకుంటున్నాను 


నిజం నీకు 
ఏదో చెప్ప దలిచి 
నన్ను నేను 
మార్చి మార్చిరాసుకుంటున్నాను 




         .....