ఏరోజుకారోజు

''నేనంతే ''అంటాను 
కాదేమోనన్న సంశయం 
నువ్వు చెప్పకుండానే 
ముఖ కండరాలు ముక్కలు చెక్కలౌతాయి


వేపపూత ప్రేమని 
ఏ గాలీ దయ తలచదు 


ఛాతీ మధ్య దుఃఖం లో 
అన్నీ మసౌతాయి పోనీ భస్మమౌతాయి 


నడక కూడా నమ్మకం లేకుండా 
వెంట పడుతుంటే నువ్వు మాత్రం ఏంచేస్తావ్ 


ఐనా 
ఒక బాధని ధ్యానించు కుంటూ 
నీ అర్ధం లో ప్రేమించుకుంటూ 
బతకడం గొప్పే నని నిశ్చయించు కున్నాక 
ఇక మిగిలిన ఆలోచనలకి 
ఆయుష్షు తక్కువే 


సరే 
నీకు మాట్లాడాలన్పించినపుడు
ఓ మిస్స్డ్డ్ డ్ కాల్ మీద నమ్మకముంచు 

          .....

ఎరుక 1

తన్మాత్రలు లేవో 

తదర్ధాలు లేవో 

మూసిన ప్రార్ధనల వేళ

దారులు కనిపించ కుంటే మాత్రం 

నువ్వొక్కడివీ వస్తే వస్తావు 

మాటల నాడులు తెగినాయో 

తదర్దాల శరీరాలు చితికాయో 

రెండో దారి లేని కాలం వెంట 

రాతలు పులకరించకుంటే మాత్రం 

రావాలనుకుంటే వస్తావు 

కనుపాపల నక్షత్రాలు రాలాయో 

తద్దీపపు వెలుగులు కుమిలాయో 

హృదయం గడియ మూసే వేళ 

వేచిన తరువులు వీయకుంటే మాత్రం 

నువ్వొక్కడివీ,నేనెక్కడికీ పోనని 

వస్తే వస్తావు 

కడుపారా.

    .....

ఆత్మవెలది 50

తపనలు ఒంటరివే 
నీవు కలియక పోతే 


రాత్రి కూడా ఒంటరిదే 
వెన్నెల వెంట లేకపోతే 


నీ ఆలోచన లేకపోతే 
ప్రేమ ఒంటరిదే 


ఈ మసక లోకం 
ఎందుకనో?????
ప్రియురాలా...!
మన భాషకు చిక్కనే చిక్కదు.

          .....

ఆత్మ వెలది 49

కూర్చున్న చోట 
కుప్పలు గా కలలు రాలాయి 


వెలుతురు కింద 
ఒకటే నీడ పడింది 


చూపులు కలిసి 
చుక్కల్ని దింపాయి 


ఈ మసక లోకం 
ఏదీ ఏరుకోదు 
ప్రియురాలా...!
ఇద్దరి చేతుల్లో ఏముందో పరులకు తెలియదు .

        .....