అదనపు వ్యధ

పోతూ పోతూ మరిచేపోతాం

చేతనైనది కూడ చేత చిక్కించుకునే
ధ్యాసే వెలగదు
పోనీ ఏదైనా మళ్లీ తెప్పించుకునే వీలు కూడా
కాకపోవచ్చు
మన దాకా చేరవేసే కాలానికి
అప్పటికి మన చిరునామా ఖాళీ కనిపించవచ్చు


నీకూ నాపని చెప్పలేను నిజానికి
నీది నీకు మోపెడంత దించే దిక్కుండదు

కలిస్తే మాత్రం
కళ్ళను ఊరడించుకుంటూ
పాదాలను పవిత్రం చేసుకోవచ్చు.

అంతుపట్టని ఆత్మ చేసే మంత్రజాలంలో
ఎవరి వంతు ఎంతనేది తెలిసేవీలుందో లేదో...

ఏదీ వెంటరాకుండా ఓ ఏర్పాటు ఉన్నాకూడా
అన్నీ కూర్చుకుందామనే కోరిక వెంట పరుగే
పెద్ద వ్యసనం

కొన్ని క్షణాల్ని మాత్రం నిలబెట్టుకోవచ్చు మనకోసం
అవి నిత్యం వాడిపోని పరిమళపు సొంపుని
పూయడం చేత .

.....
24-4-2014