ఆనందకాలం 3

ఆనందుడు యధావిధి గా వస్తూ ... కాలెగరేసి ''డిషుం'' అని
బోర్లా వేసిన v అక్షరం లా కాళ్ళు పక్కకు జరిపి నిలబడ్డడు.

'నాకో డౌట్ డాడీ '
నడుం మీద చేతులు రెండు బ్రాకెట్ల లా పెట్టిండు

వచ్చాడంటేనే ఒక విశేషం ఉంటుంది లెండి

చెప్పు...అన్నాను.

'జిజంగా చెప్పాలె' అన్నాడు చూపుడు వేలు పైకెత్తి .

తలూపాను .

'అసలు హార్సు , డంకీ ...ఒక్క తీర్గానే ఉంటయ్ కదా!'

చూపుడు వేలు ఇంకా దింపలే ...బలమైన ప్రశ్న సుమా! అన్నట్టుంది.

అవునన్నాను .

'మరి వాటికి వేరు వేరు పేర్లెందుకు పెట్టిండ్రు ? హార్సని... డంకీ అని '

ఎలా చెప్పాలా అని క్షణం అలోచించి ...అర్ధమవటం కోసమని ...

'గాడిద పొట్టిగా ఉంటుంది...
గుర్రం కొంచెం ఎత్తుగా ఉంటుంది కదా అందుకే'

తల పట్టుకున్నాడు .
నా జవాబుకు ఇంకో ప్రశ్న సిద్ధం చేసాడు.

'మరి మమ్మి పొట్టిగ ఉంది ...నువ్వు పొడవున్నవ్ గా ...మనుషులంటున్నాం కద్దా...'

గన్ పేల్చాడ్.....

వెంటనే...'మరి మరి ...కుక్కలు కొన్ని పొట్టిగ కొన్ని ఎత్తు గ వుంటే కూడా కుక్కలనే అంటున్నాం కదా...'

''ఒరేయ్''....అరవాలనిపించింది .
కాని అరవలే...
కొంచెం తెలివిగా సమాధానం చెప్పాలె వీడికి అనుకొని ...

'గాడిద కు ఉరకడం రాదు ...డల్లుగా నడుస్తది...
గుర్రమైతే స్పీడుగ ఉరుకుతది...active...గా ఉంటది .'

అన్న వెంటనే

'మరి నీకు ఉరకడం రాదు కద నా లెక్క 'అనుకుంట
అవతలికి ఉరికిండు.

అటు మల్లక్కని నన్ను ఇరుకున పెట్టిండీ రోజు .
పిల్లాడు చూసిండ్రా .

.....
6-1-2014.