ఎప్పటికప్పుడు గుండె తడుపుకోవాలి

అంతా వెళ్ళిపోయాక 
అడుగులచప్పుడు గాల్లో లీనమయ్యాక
ముసురు తుఫాను మనసు 
ఎటూ పోలేక 


ఓ మూల ఒంటరిగా 
పిల్లి ముడుచుకున్న అవయవాలతో 
దేహం...
నేల మీద నడవని కనురెప్పల 
కాసేపు మూసి 


ఇక్కడినుంచి ఎటెల్లాలో 
పొట్టకూటికోసమో ,మరెవరి కోసమో 
ఈలోపునెవడో కట్టెతోనో 
తుపాకీతోనో 
ఓ చురకత్తి వాక్యం తోనో 
సమాప్తం చేయవచ్చు 


ఎలాగైనా ఈలోపు 
ఆలోచనల్ని ,దాన్ని చుట్టిన 
పువ్వుల గుభాళింపు బంధాల్ని 
పెనవేసుకున్న పచ్చదనాన్ని మాత్రం 
బతికించుకోవాలి.


    .....