నా సెలయేరు హృదయం ......9

గుడులు గోపురాలు 

దేనికోసం తిరుగుతాను...

నదులు గుండాల్లో 

ఎందు కోసం మునుగుతాను ...

అన్నింటా నిన్ను స్పర్శిస్తాను 

అణువణువుని ప్రేమమయం చేస్తాను 

                                ఈ కుటిల లోకానికి 

                                లీనమవటం తెలియచేయి 

                                ప్రియురాలా...!

                                ఈ రాత్రిని వెళ్ళనీయకు 

కొన్నిఅజ్ఞాత కాంతులు నా అతనివి

         1


అదృష్టానికి పనివాడివి 
ఇక నీతో నీకు పనిలేదని 
ముఖం మీదే తలుపులు మూసాడు
                                              అతను 


నేను రంగులు మార్చుకుంటూ 
మనుషుల మధ్య 
నవ్వుల్నీ భుజాన మోసే సందర్భాలు 
                                                అతని 
కంటపడి సిగ్గు పడ్డాయి 


''ఇద్దరి సాహచర్యం మధ్య విలువలు 
ఇద్దరి ఆలింగనాల మధ్య అంతస్తులు 
మనుషులు సంపదలతో కుట్టుకొని 
సంబరాలలో తనని వదిలి పోయాడు 
వెతుక్కోవా?...వెతుక్కోవా?....''
                                               అతనే
            2


ప్రశ్నలు రాపిడి చేసి 
విసిరిన మంటకి 
బతుకు కమురు వాసన


ఒంటరితనం లో 
అతను నాతోడు 
అందరి మధ్య అజ్ఞాతం 
మా తోడు


మనసు ఉరేసుకొనే 
సందర్భాలలో అతను ప్రవేశిస్తాడు 
కొంత కొట్లాట తర్వాత 
వెతికినా దొరకడు


క్షణానికి ముందు భాగాన 
ప్రవేశించి 
క్షణానికి చివరి కొసన 
కనిపించడు 


ఆ మధ్యది అజ్ఞాతం .....


        .....

నా సెలయేరు హృదయం......8

వర్షపు హృదయం తిరిగి తిరిగి 
సముద్రపు ఒడిలో కలియక తప్పదు 


గాలి సరసాలు వీచి వీచి 
పూల తోటల చెక్కిళ్ళ మీద వాలక తప్పదు 


నేను ప్రేమదిమ్మరి నై
చివరికి చేరే చోటు తెలియదా?


                        ఈ వ్యసన లోకానికి 
                        ప్రకృతిధర్మం తెలియచేయి 
                        జవరాలా.....!
                        ఈ రాత్రిని వెళ్ళనీయకు 


                    .....

నా సెలయేరు హృదయం.....7

ఉదయించక ముందు 

తూరుపు కదలికల సౌరభం నీవు 

వికసించే ముందు 

పూవుల మకరందపు యవ్వనం నీవు 

అటూ ఇటూ పరిభ్రమలు చేసే 

సౌందర్య పిపాసిని నేను 

                     ఈ మసక లోకానికి 

                     రసికులు పాపులు 

                     ప్రియురాలా.....!

                     ఈ రాత్రిని వెళ్ళనీయకు 

                     .....